ذكّرتني ياضيف ناسٍ عزيزين
أنا أشهد إن اسمك عزيزٍ عليّه
قلبي بكى من قبل ماتدمع العين
اسمك جذبني والمواجع خفيه
ذكّرتني سيد الرجال الميامين
زبن الدخيل ولا يهاب المنيه
من جاه يشكي الهم والدَّين
يقضي له الحاجه بنفسٍ رضيّه
فيه المهابه والوفاء حافظ الدين
كلٍّ ليا شافه يدق التحيه
من هيبته تخشاه روس الشياطين
بادي ابن بارود زبن الونيه
والله لو سمّو على اسمه كثيرين
محدٍ يجي مثله ولاحدٍ سويّه
يارب تبني له قصور وبساتين
أنهارها تجري صبح وعشيه
في جنة الفردوس بين المصلين
بين النفوس الطاهره والبريه
أزواجه الزينات حورٍ من العِين
جزاه من ربّه جزيل العطيه
عساه بآخرته ثقيل الموازين
مرحوم يا راعي اليدين الوفيه
يبكي عليه من القبايل ملايين
شيوخ نجد أهل الوفاء والحميّه
دربٍ سرى به فيه الأجيال ماشين
كلٍّ سرى به ما درى عن خويّه
بقلم شاعرة جيلها